Канон Ангелу хранителю

Ангеле Бóжий, храни́телю мой святы́й, живóт мой соблюди́ во стрáсе Христá Бóга, ум мой утверди́ во и́стиннем пути́, и к любви́ гóрней уязви́ ду́шу мою́, да тобóю направля́емь, получу́ от Христá Бóга вéлию ми́лость.

Слáва, и ны́не:

Богородичен: Святáя Влады́чице, Христá Бóга нáшего Мáти, я́ко всех Творцá недоумéнно рóждшая, моли́ блáгость Егó всегдá, со храни́телем мои́м Ангелом, спасти́ ду́шу мою́, страстьми́ одержи́мую, и оставлéние грехóв даровáти ми.

Глас 8-й

Песнь 1

Ирмос: Пои́м Гóсподеви, провéдшему лю́ди Своя́ сквозé Чермнóе мóре, я́ко еди́н слáвно прослáвися.

Иису́су: Гóсподи Иису́се Христé Бóже мой, поми́луй мя.

Песнь воспéти и восхвали́ти, Спáсе, Твоегó рабá достóйно сподóби, безплóтному Ангелу, настáвнику и храни́телю моему́.

Святы́й Ангеле Бóжий, храни́телю мой, моли́ Бóга о мне.

Еди́н аз в неразу́мии и в лéности ны́не лежу́, настáвниче мой и храни́телю, не остáви менé погибáюща.

Слава: Ум мой твоéю моли́твою напрáви, твори́ти ми Бóжия повелéния, да получу́ от Бóга отдáние грехóв, и ненави́дети ми злых настáви мя, молю́ся ти.

И ныне: Моли́ся, Деви́це, о мне, рабé Твоéм, ко Благодáтелю, со храни́телем мои́м Ангелом, и настáви мя твори́ти зáповеди Сы́на Твоегó и Творцá моегó.

Песнь 3

Ирмос: Ты еси́ утверждéние притекáющих к Тебé, Гóсподи, Ты еси́ свет омрачéнных, и поéт Тя дух мой.

Святы́й Ангеле Бóжий, храни́телю мой, моли́ Бóга о мне.

Все помышлéние моé и ду́шу мою́ к тебе возложи́х, храни́телю мой; ты от вся́кия мя напáсти врáжия избáви.

Святы́й Áнгеле Бóжий, храни́телю мой, моли́ Бóга о мне.

Враг попирáет мя, и озлобля́ет, и поучáет всегдá твори́ти своя́ хотéния; но ты, настáвниче мой, не остáви менé погибáюща.

Слава: Пéти песнь со благодарéнием и усéрдием Творцу́ и Бóгу даждь ми, и тебé, благóму Ангелу, храни́телю моему́: избáвителю мой, изми́ мя от враг озлобля́ющих мя.

И ныне: Исцели́, Пречи́стая, моя́ многонеду́жныя стру́пы, я́же в души́, прожени́ враги́, и́же при́сно бóрются со мнóю.

Седален, глас 2-й

От любвé душéвныя вопию́ ти, храни́телю моея́ души́, всесвяты́й мой Ангеле: покры́й мя и соблюди́ от лукáваго ловлени́я всегдá, и к жи́зни настáви небéсней, вразумля́я и просвещáя и укрепля́я мя.

Слáва, и ны́не:

Богородичен: Богорóдице безневéстная Пречи́стая, Яже без сéмене рóждши всех Влады́ку, Тогó со Ангелом, храни́телем мои́м моли́, избáвити ми ся вся́каго недоумéния, и дáти умилéние и свет души́ моéй и согрешéнием очищéние, Яже еди́на вскóре заступáющи.

Песнь 4

Ирмос: Услы́шах, Гóсподи, смотрéния Твоегó тáинство, разумéх делá Твоя́, и прослáвих Твоé Божествó.

Святы́й Ангеле Бóжий, храни́телю мой, моли́ Бóга о мне.

Моли́ Человеколю́бца Бóга ты, храни́телю мой, и не остáви менé, но при́сно в ми́ре житиé моé соблюди́ и подáждь ми спасéние необори́мое.

Святы́й Ангеле Бóжий, храни́телю мой, моли́ Бóга о мне.

Яко засту́пника и храни́теля животу́ моему́ приéм тя от Бóга, Ангеле, молю́ тя, святы́й, от вся́ких мя бед свободи́.

Слава: Мою́ сквéрность твоéю святы́нею очи́сти, храни́телю мой, и от чáсти шу́ия да отлучéн бу́ду моли́твами твои́ми и причáстник слáвы явлю́ся.

И ныне: Недоумéние предлежи́т ми от обышéдших мя зол, Пречи́стая, но избáви мя от них скóро: к Тебé бо еди́ней прибегóх.

Песнь 5

Ирмос: Утренююще вопиéм Ти: Го́споди, спаси́ ны; Ты бо ecи́ Бог наш, рáзве Тебé инóго не вéмы.

Святы́й Ангеле Бóжий, храни́телю мой, моли́ Бóга о мне.

Яко имéя дерзновéние к Бóгу, храни́телю мой святы́й, Сегó умоли́ от оскорбля́ющих мя зол избáвити.

Святы́й Ангеле Бóжий, храни́телю мой, моли́ Бóга о мне.

Свéте свéтлый, свéтло просвети́ ду́шу мою́, настáвниче мой и храни́телю, от Бóга дáнный ми Ангеле.

Слава: Спя́ща мя зле тяготóю грехóвною, я́ко бдя́ща сохрани́, Ангеле Бóжий, и возстáви мя на славослóвие молéнием твои́м.

И ныне: Мари́е, Госпожé Богорóдице безневéстная, надéждо вéрных, врáжия возношéния низложи́, пою́щия же Тя возвесели́.

Песнь 6

Ирмос: Ри́зу мне подáждь свéтлу, одея́йся свéтом я́ко ри́зою, многоми́лостиве Христé Бóже наш.

Святы́й Ангеле Бóжий, храни́телю мой, моли́ Бóга о мне.

Вся́ких мя напáстей свободи́, и от печáлей спаси́, молю́ся ти, святы́й Ангеле, дáнный ми от Бóга, храни́телю мой дóбрый.

Святы́й Ангеле Бóжий, храни́телю мой, моли́ Бóга о мне.

Освети́ ум мой, блáже, и просвети́ мя, молю́ся ти, святы́й Ангеле, и мы́слити ми полéзная всегдá настáви мя.

Слава: Устáви сéрдце моé от настоя́щаго мятéжа, и бдéти укрепи́ мя во благи́х, храни́телю мой, и настáви мя чу́дно к тишинé живóтней.

И ныне: Слóво Бóжие в Тя всели́ся, Богоро́дице, и человéком Тя показá небéсную лéствицу; Тобóю бо к нам Вы́шний сошéл есть.

Кондак, глас 4-й

Яви́ся мне милосéрд, святы́й Ангеле Госпóдень, храни́телю мой, и не отлучáйся от менé сквéрнаго, но просвети́ мя свéтом неприкосновéнным и сотвори́ мя достóйна Цáрствия Небéснаго.

Икос

Уничижéнную ду́шу мою́ мнóгими соблáзны, ты, святы́й предстáтелю, неизречéнныя слáвы небéсный сподóби, и певéц с ли́ки безплóтных сил Бóжиих, поми́луй мя и сохрани́, и пóмыслы дóбрыми ду́шу мою́ просвети́, да твоéю слáвою, Ангеле мой, обогащуся, и низложи́ зломы́слящия мне враги́, и сотвори́ мя достóйна Цáрствия Небéснаго.

Песнь 7

Ирмос: От Иудéи дошéдше óтроцы, в Вавило́не иногдá, вéрою Тро́ическою плáмень пéщный попрáша, пою́ще: отцéв Бóже, благословéн еси́.

Святы́й Ангеле Бóжий, храни́телю мой, моли́ Бóга о мне.

Ми́лостив бу́ди ми и умоли́ Бóга, Госпóдень Ангеле, имéю бо тя засту́пника во всем животé моéм, настáвника же и храни́теля, от Бóга даровáннаго ми во вéки.

Святы́й Ангеле Бóжий, храни́телю мой, моли́ Бóга о мне.

Не остáви в путь шéствующия души́ моея́ окая́нныя уби́ти разбóйником, святы́й Ангеле, я́же ти от Бóга преданá бысть непорóчне; но настáви ю́ на путь покая́ния.

Слава: Всю посрáмлену ду́шу мою́ привожду́ от лукáвых ми пóмысл и дел: но предвари́, настáвниче мой, и исцелéние ми подáждь благи́ми по́мыслы, уклоня́ти ми ся всегдá на прáвыя стези́.

И ныне: Прему́дрости испóлни всех и крéпости Божéственный, Ипостáсная Прему́дросте Вы́шняго, Богорóдицы рáди, вéрою вопию́щих: отéц нáших Бóже, благословéн еси́.

Песнь 8

Ирмос: Царя́ Небéснаго, Егóже пою́т во́и áнгельстии, хвали́те и превозноси́те во вся вéки.

Святы́й Ангеле Бóжий, храни́телю мой, моли́ Бóга о мне.

От Бóга пóсланный, утверди́ живóт мой, рабá твоегó, преблаги́й Ангеле, и не остáви менé во вéки.

Святы́й Ангеле Бóжий, храни́телю мой, моли́ Бóга о мне.

Ангела тя су́ща блáга, души́ моея́ настáвника и храни́теля, преблáженне, воспевáю во вéки.

Слава: Бу́ди ми покрóв и забрáло в день испытáния всех человéк, вóньже огнéм искушáются делá благáя же и злáя.

И ныне: Бу́ди ми Помóщница и тишинá, Богоро́дице Приснодéво, рабу́ Твоему́, и не остáви менé лишéна бы́ти Твоегó влады́чества.

Песнь 9

Ирмос: Вои́стинну Богорóдицу Тя исповéдуем, спасéннии Тобóю, Дéво Чи́стая, с безплóтными ли́ки Тя величáюще.

Иису́су: Гóсподи Иису́се Христé Бóже мой, поми́луй мя.

Поми́луй мя, еди́не Спáсе мой, я́ко Ми́лостив еси́ и Милосéрд, и прáведных ликóв сотвори́ мя причáстника.

Святы́й Ангеле Бóжий, храни́телю мой, моли́ Бóга о мне.

Мы́слити ми при́сно и твори́ти, Госпóдень Ангеле, благáя и полéзная дáруй, я́ко си́льна яви́ в нéмощи и непорóчна.

Слава: Яко имéя дерзновéние к Царю́ Небéсному, Тогó моли́, с прóчими безплóтными, поми́ловати мя окая́ннаго.

И ныне: Мнóго дерзновéние иму́щи, Дéво, к Воплóщшемуся из Тебé, преложи́ мя от уз и разрешéние ми подáждь и спасéние, моли́твами Твои́ми.

Молитва Ангелу хранителю

Ангеле Христóв святы́й, к тебé припáдая молю́ся, храни́телю мой святы́й, придáнный мне на соблюдéние души́ и тéлу моему́ грéшному от Святáго Крещéния, аз же своéю лéностию и свои́м злым обы́чаем прогнéвах твою́ пречи́стую свéтлость и отгнáх тя от себé всéми сту́дными дéлы: лжáми, клеветáми, зáвистию, осуждéнием, презóрством, непокóрством, братоненавидéнием, и злопомнéнием, сребролю́бием, прелюбодея́нием, я́ростию, ску́постию, объядéнием без сы́тости и опи́вством, многоглагóланием, злы́ми пóмыслы и лукáвыми, гóрдым обы́чаем и блу́дным возбешéнием, имы́й самохотéние на вся́кое плотскóе вожделéние. О, злóе моé произволéние, егóже и скóти безсловéснии не творя́т! Да кáко возмóжеши воззрéти на мя, или́ приступи́ти ко мне, áки псу смердя́щему? Котóрыма очи́ма, Ангеле Христóв, воззри́ши на мя, оплéтшася зле во гну́сных дéлех? Да кáко ужé возмогу́ отпущéния проси́ти гóрьким и злым мои́м и лукáвым дея́нием, в ня́же впадáю по вся дни и нóщи и на всяк час? Но молю́ся ти припáдая, храни́телю мой святы́й, умилосéрдися на мя грéшнаго и недостóйнаго рабá твоегó (имя), бу́ди ми помóщник и засту́пник на злáго моегó сопроти́вника, святы́ми твои́ми моли́твами, и Цáрствия Бóжия причáстника мя сотвори́ со всéми святы́ми, всегдá, и ны́не и при́сно и во вéки векóв. Ами́нь.